Nu 13. oktobra septenis nedelis iz prīšku Kruoslovys i Ludzys nūvodu pīrūbežā byus sastūpami Latgalīšu kulturys bīdreibys (LKB) puorstuovi ar izgleitojūšu sarunu šovu “Paskaidroj maņ …!” tū pīrūbežys vītu, kurā atsarūnam. Informaceja byus socialajūs teiklūs, pošvaļdeibuos i pa vacai mūdei – iz afišu stobim.
Treis tāli – Vieju Rozale, Klāvu Tekļa i Plotku Jurs – ar humora elementim (anekdotis, puorpratumu skečs, hiperbolays itt.), muzykys i multimedeju paleidzeibu runuos ar vītejū kūpīnu par dažaidom aktualom lītom. Ari tom, kas nateik pamaneitys regiona ci vaļsts leimenī: kas īzeimej konkretuos vītys pīviļceibu, ar kū vītejī lepojās; kaidys problemys jūs nūmuoc i kai tū varātu rysynuot, kaidus olūtus jī izmontoj informacejis īgiušonai, kai jī izviertej informaceju i kū tī var i vajag maineit.
Saruna aizavierzēs ari iz praktiskim padūmim, kur Latgalīšu kulturys bīdreibys puorstuovu aizdavums byus izskaidruot, kū nūzeimej 72 stunžu sūma, parkū tei ir juosaprūt vaira metaforiski, a kam sātā ir juobyut, naatkareigi nu krīzis veida i ilguma. Ar kū sevkura individa gataveiba krīzei atsaškir piļsātā i laukūs, a pats svareiguokais – nu juo lāmuma reikuotīs, palikt sātā voi dūtīs prūm nu sātys.
LKB puorstuovi aicynoj pīsabīdruot ari vītejūs pošvaļdeibu, NVO liderus, kab sarunā dzierdātais napalīk tik izrunuots, bet teik ari rysynuots tymā leimenī, kur kaida problema ir atrysynuojama. Sarunu šova daleibnīki veiduos ari eisys reportažys, raksturojūt vītejū kulturys i informacejis telpu, cytym paruodūt lapnuma i guodeibys objektus un problemys.
Ka Tev ir kas sokams vaļdeibai, vītejai ci nacionalajai, sābram, draudzeigam ci na vysai saprūtamam, i tu vari izateikt na tik viņ socialajūs teiklūs, a dzeivūs cylvākūs, gaidam iz sarunu. I kas zyn iz kūpeigu sadarbeibu turpmuok!
Grafikā var byut nalelys izmainis, tok plānuot sev tyvuokū apleicīni jau var suokt šudiņ: Zilupe – 13.10, Kaplava – Piedruja – 20.10, Indra – Robežnieki – 27.10, Neikšāni (Asūne) – Porečje – 03.11, Šķaune – Pasiene – 10.11, Zaļesje – Briģi –– 24.11, Cibla – Goliševa (Mērdzene) – 01.12, Līdumnieki – 08. vai 15.12.
Projekts tapis ar Latvijas Republikas Aizsardzības ministrijas atbalstu.
