Nikodema Rancāna konkursam ir dasaceiti 17 pretendenti nu Rēzeknis piļsātys i nūvoda, Kruoslovys, Preiļu, Leivuona nūvoda. Nūslāguma pasuokums nūtiks 21. septembrī 14.00 stuņdēs Maltys vydsškolā.
N. Rancāna bolvai ir dasaceiti 17 pretendenti nu pīcu Latgolys pošvaļdeibu, pyrmū reizi nu Leivuona nūvoda. Pretendenti, leidzeigi kai īprīškejā godā puorstuov divys pamata nominacejis: par īguļdejumu un sasnāgumim latgalīšu volūdys, kulturviesturis un nūvoda vuiceibys īvīsšonā un īdzeivynuošonā školā i par radūšu i psihologiski atbolstūšu pīeju muoceibu ci studeju vidē. Itūgod spylgtai var izceļt divys teņdencis: školuotuoji, kas aplīcynuojuši sovu variešonu Dzīšmu svātkūs, i školuotuoji ar lelu darba stāžu, var saceit “multimuokslinīki”, partū ka vysim ir kaida aizaraušona, vairuoki dorba i vuiceibu vierzīni.
Konkursa leluo bolva ir sudobra pokovsakta, kurys autors ir rūtkaļs Rihards Ciblis. Tai kai pasuokums nūtiks Maltā, tod byus vareiba satikt pošu bolvys autoru, dazynuot par rūtkolšonu Maltā. Sovys bolvys padūs ari Latgolys Etnografiskuo viestnīceiba (vadeituoja Iveta Seimanova) i Latvejis Izgleiteibys i zynuotnis darbinīku arūdbīdreiba (vadeituoja Inga Vanaga).
Nūslāguma pasuokums nūtiks 21. septembrī 14.00 stuņdēs Maltys vydsškolā. Iz pasuokumu gaideiti kai pretendentu izvierzietuoji, tai jūs atbaļsteituoji, poši konkursa daleibnīki, kai ari īprīškejūs godu nominanti i sadarbeibys partneri. Byus muzykalais puorsteigums nu Rēzeknis nūvoda vokaluos studējis “Skonai” (vadeituoja Guntra Kuzmina-Jukna). Naizpaliks ari sirsneigys sarunys i otkon redziešonuos prīca pi čaja.
Konkursu organizej Latgalīšu kulturys bīdreiba sadarbeibā ar Rēzeknis nūvoda pošvaļdeibu. Konkurss ļaun izceļt i gūdynuot lobuokūs nūzaris pedagogus, ceļūt školuotuoja profesejis prestižu sabīdreibā i atguodynojūt, cik svareiga lūma puormaiņu procesā ir izgleiteibai.
Konkursa nūslāgumu finansiali atbolsta Latgolys pošvaļdeibys, privatī zīduotuoji i bolvu padevieji. Informativais atbolsts – “Vietējā Latgales avīze”, Latgalīšu kulturys ziņu portals lakuga.lv, Latvejis Radio Latgolys studeja.
Informaceju sagataveja Ilga Šuplinska, Latgalīšu kulturys bīdreibys vadeituoja
