Sastdiņ, 7. septembrī, Rēzeknis nūvoda Rogovkā jau trešū reizi byus latgaliski rokstūšūs dzejnīku saceņseiba “Rogovkys dzejis voga”. Dzejis autoru skaitejumus papyldynuos apvīneibys “Bruoli i muosys”, grupys “Laimas Muzykanti”, reperis Ūgys i cytu muziķu uzastuošonys, taipat gaidomi pyrmatskaņuojumi ar pārnejuo gods uzvarātuoju – Vinsenta Kūkoja i Annelis Slišānis – dorbim.
Dzejis slams latgaliski “Rogovkys dzejis voga” byus 7. septembrī 19.00 stuņdēs Nautrānu sporta hallē-kulturys nomā Rēzeknis nūvoda Rogovkā. Ituo gods dzejis slamā pīsadaleis vysmoz ostoni latgaliski rokstūši autori, bet saceņseibys, kas nūtiks trejuos kuortuos, uzvarātuoju nūsaceis žurejis i skateituoju bolsuojums. Latgaliski rokstūši dzejis autori, kuri grib paraudzeit pīsadaleit dzejis slamā, nūtikšonai var pīsasaceit da 28. augusta, aizpiļdūt anketu ite: https://ej.uz/dzejisvoga2024.
Dzejis slams Rogovkā 2022. godā tyka aizsuokts ar gribiešonu itaidu dzejis skaiteišonys formu paraudzeit ari latgaliski, bet niu tys palics ari par vareibu dzierdēt jaunus latgaliski raksteitus dorbus, kai ari īpazeit vaira pošus autorus. Pasuokuma nūsaukumā “Rogovkys dzejis voga” simboliski sasavej septembra pyrmuo daļa, kas laukūs īrosts ir ražys nūvuokšonys, eipaši buļbu laseišonys laiks, i dzejis saceņseiba. Leidzeigi kai buļbu vogā, kur zynomu apbreinu izapeļnej dreižuokais i ceņteiguokais laseituojs, ari slamā vys tik kai uzvarātuojs da gola teik tys, kurs ar sovu rodūšū dorbu spiej vysa spylgtuok puorlīcynuot žureju i skateituojus, ir izveiceiguokais vuordu meistars. Dzejis slama uzvarātuojs sajims naudys bolvu, bet juo dzejūli tiks publicāti latgalīšu kulturys ziņu portalā lakuga.lv. Kusteiba “Volūda” 2024. godā aizsuokuse literaruos jaunradis latgaliski veicynuošonys pasuokumu programu, kurā “Rogovkys dzejis vogys 2024” uzvarātuoju gaida jaunums – vareiba 2025. godā izmontuot nedeļu garu raksteišonys rezidenci Latgolā (ar apmoksuotu uzaturiešonu rezidencē i stipendeju rodūšajam dorbam).
“Rogovkys dzejis vogys 2024” vadeišona itūreiz byus uzticāta Edgaram Provejam, bet pasuokumu papyldynuos reperis Ūgys, apvīneibys “Bruoli i muosys”, dzīsminīka Vinsenta Kūkoja, muziķu Ingara i Mareka Gusānu, Juoņa Matvejenko, kai ari grupys “Laimas Muzykanti” uzastuošonys. Par dzejis slama tradiceju palīk muzykalu jaundorbu radeišona ar pārnejuo gods nūtikšonys uzvarātuoja dorbim – itūreiz jauni skaņdorbi tūp ar Vinsenta Kūkoja i Annelis Slišānis dzejūlim. Piec jaunuo dzejis slama uzvarātuoja nūskaidruošonys skateituojus ar koncertprogramu prīcynuos etnomuzykys grupa “Laimas Muzykanti”.
Rogovkā īcarātais dzejis slams ir vīna nu septembrī tradicionalūs Dzejis dīnu laika nūtikšonu. Dzejis slams ir dzejis kusteiba, kas Latvejā i pasaulī (storptautyski zynoma kai “Poetry slam”) atdzeivynuojuse interesi par myusu dīnu dzeju. Tuos pamatā ir nūsaceita dzejnīku saceņseiba, kurys laikā autori skaita sovus dorbus skateituoju prīškā, bet žurejis i skateituoju bolsuojumā teik nūskaidruots ituos saceņseibys uzvarātuojs.
Latgaliskū dzejis slamu “Rogovkys dzejis voga” reikoj Rēzeknis nūvoda Nautrānu pogosta puorvaļde sadarbeibā ar latgalīšu kulturys kusteibu “Volūda”. Nūtikšonu atbolsta Rēzeknis nūvoda pošvaļdeiba, latgalīšu kulturys ziņu portals lakuga.lv i Vaļsts kulturkapitala fonds. Īīšona dzejis slamā “Rogovkys dzejis voga” i “Laimas Muzykantu” koncertprogramā piec tam vysim grybātuojim ir bezmoksys.
Taipat “Volūda”, sasadorbojūt ar Rēzeknis nūvoda Nautrānu sporta halli-kulturys nomu i Ūzulainis pogostu, 7. septembrī 11 stuņdēs nu reita aicynoj iz muzykalom dzejis reitiškom “Gulguošona” Rēzeknis nūvoda Pleikšņūs, kur ar dzejis skaitejumim pīsadaleis literati Annele Slišāne, Valentins Lukaševičs, Arvis Viguls i Anita Mileika, bet ar muzyku reitu pīpiļdeis Vinsents Kūkojs, Ingars Gusāns i flautu grupa “Svīres”.
Vaira dazynuošonai: Inga Vigule, Nautrānu sporta hallis-KN vadeituoja, inga.vigule@rezeknesnovads.lv, 28335357.
Informaceju sagataveja: Edeite Laime, Latgalīšu kulturys kusteiba “Volūda”, vasals@voluda.lv, 29509672.
[{“src”:”https:\/\/rezeknesnovads.lv\/wp-content\/uploads\/2024\/08\/ROGOVKYS-DZEJIS-VOGA_afisa-2024.jpg”,”type”:”image”,”opts”:{“text”:””,”thumb”:”https:\/\/rezeknesnovads.lv\/wp-content\/uploads\/2024\/08\/ROGOVKYS-DZEJIS-VOGA_afisa-2024.jpg”}}]
